Etazini : FAA sispann tout vòl k ap dekole sou tout teritwa peyi a akoz yon pàn kominikasyon

Administrasyon Federal Aviyasyon Etazini (FAA) pran yon desizyon ekstraòdinè vandredi 13 novanm 2026 la, lè li bay lòd pou sispann tout vòl k ap dekole nan ayewopò atravè peyi a. Desizyon sa a vini apre yon pàn nan sistèm kominikasyon ki afekte plizyè sant kontwòl sikilasyon ayeryen an.

Daprè otorite yo, mezi sa a pran akoz sikonstans ekstraòdinè ak enkyetid pou sekirite pasaje yo. Pàn nan afekte plis pase 22 sant rejyonal ki responsab pou kontwole avyon k ap sikile ant diferan ayewopò nan peyi a.

Sekretè Transpò ameriken an, Sean Duffy, fè konnen teknisyen FAA yo deja ap mennen ankèt pou idantifye koz pwoblèm nan. Pandanstan, avyon ki te deja nan syèl la te gen otorizasyon pou kontinye vole epi ateri an sekirite, men okenn lòt avyon pa t dwe dekole jiskaske otorite yo bay nouvo direktiv.

Daprè chif FlightAware, prèske 7 000 vòl te anrejistre kòm vòl anreta oswa anile akoz sitiyasyon an.

Bò kote pa li, Sekretè Sekirite Enteryè a, Markwayne Mullin, fè konnen pou moman an pa gen okenn prèv ki montre se yon atak malveyan oswa yon zak volontè ki lakòz pàn nan. Li prezante ensidan an kòm yon pwoblèm telekominikasyon.

Se youn nan entèripsyon ki pi ra nan istwa aviyasyon ameriken an. Dènye fwa FAA te pran yon mezi konsa sou tout teritwa a se te nan mwa janvye 2023, apre yon pàn nan sistèm enfòmasyon ajans lan.