Ayiti-Salvadò : Fils-Aimé vle kenbe militè salvadoryen yo pi lontan nan peyi a

Gouvènman salvadoryen an anonse, lendi 16 novanm 2026 la, militè li yo ki deplwaye an Ayiti ap kite peyi a depi misyon rechèch ak sekou kat militè salvadoryen ki disparèt yo fin akonpli. Yon pozisyon ki diferan ak sa otorite ayisyen yo ap anvizaje, paske Premye minis Alix Didier Fils-Aimé ta vle diskite sou posiblite pou pwolonje prezans sòlda salvadoryen yo sou teritwa ayisyen an.
Minis Jistis ak Sekirite Piblik Salvadò a, Gustavo Villatoro, fè konnen kontenjan militè peyi li a ap retounen Salvadò depi yo jwenn kat militè ki disparèt yo. Li fè deklarasyon sa yo devan laprès nan San Salvador, nan prezans omològ ayisyen li, Patrick Pélissier.
« Si demen yo ta parèt ankò, jan prezidan Bukele te di sa, n ap retounen », se deklarasyon minis salvadoryen an fè, yon fason pou montre misyon rechèch ak sekou a se kondisyon ki pral detèmine kilè twoup yo ap kite Ayiti.
Bò kote pa li, minis ayisyen Patrick Pélissier fè konnen Premye minis Alix Didier Fils-Aimé ap prepare rankont ak otorite salvadoryen yo pou egzamine posiblite pou pwolonje deplwaman militè sa a. Kesyon an ta dwe fè pati diskisyon ant de gouvènman yo nan kad koperasyon bilateral yo sou sekirite.
Pandanstan, vis-prezidan Salvadò a, Félix Ulloa, fè konnen otorite yo poko prevwa rann piblik kontni akò koperasyon sekirite ki siyen ant Ayiti ak Salvadò a. Daprè li, se lè kondisyon diplomatik yo pèmèt sa detay akò a ap kapab divilge. Li mete aksan sou rezon sekirite pou jistifye desizyon sa a.
Sitiyasyon sa a mete aksan sou diferans nan apwòch de gouvènman yo: alòske Salvadò kondisyonnen retrè twoup li yo ak finisman misyon rechèch kat militè ki disparèt yo, gouvènman ayisyen an ap chèche jwenn yon posiblite pou pwolonje prezans yo, nan yon kontèks kote ensekirite kontinye reprezante youn nan pi gwo defi peyi a.



